[ Up ] [ Tasmanien ] [ Hi Vallee Farm ] [ Esperance ] [ 4x4 ] [ Party ] [ Halloween ] [ Aussies ] [ Ballonflug ] [ Bibbulmun Track ] [ Ostern ]
Oschter Uusflug an Alkimos Beach.
Karfriitig ond Samschtig hämmer mit Fründe en Uusflug gmacht an en Schtrand, ca. 30 km nördlich vo Kallaroo. Usem Meer lueged d'Reschte vomene versunkene Schiff - d'Alkimos. A de Weschtküschte vo Auschtralie häts en Huufe Schiffswracks, englischi, holländischi ond sogar portugisischi. D'Alkimos isch nur öppe 800m vom Schtrand, aber usser Bläch ond Seetang gits nüt me usezhole.
Mer bruucht en 4WD zum an Schtrand cho. Mir händ vomene Bekannte chönne sin "Work Ute" usleihe. Vo de normale Schtrass füered schmali zuegwachsni Pfad an Schtrand. Es isch en holperigi Fahrt ond mängisch simmer fascht kipped und s'Auto hät en huufe Chratzer igfange.
Am Meer hämmer eusi Zält uufgschtellt, d'Manne händ gfisched ond d'Fraue händ (erwartigsvoll) tisched - und schliesslich simmer froh gsi, dass mer es Steak mitgno händ, sosch wäred mer verhungered. Nach uusgibigem Apero hämmer am Abig es Laagerfüür gmacht ond eusi Steaks ond Hördöpfel brutzlet. Natürli het au en feine Aussie Rotwii nid gfählt. Es isch es herrlichs Erläbnis, underem Schternehimmel z'sitze ond de Wälle zuelose.
Nach Sonneuufgang hämmer zmörgelet ond packt und de Thomi isch zum 'Wrack vo de Alkimos use gschwumme. Dänn simmer no i de Düne umegfahre, händ zum Teil gfürchigi Abfahrte gwagt am Steilhang ond ab ond zue simmer im Sand schteckebliibe. Sölled mer jetz doch en 4WD chaufe???
 |
 |
 |
 |
 |
 |
 |
 |
 |
 |
zum Vergrössern der Fotos draufklicken und mit "Back-Taste" zurück zum Gesamtbild